पक्की पुल अलपत्रः झोलुङ्गे पुलबाट ट्रान्सफर्मर बोक्नुपर्ने बाध्यता

तनहुँ। तनहुँको आँबुखैरेनी गाउँपालिका–६ प्यूघरमा जलेर बिग्रिएको ट्रान्सफर्मर परिवर्तन गरी विद्युत् सेवा पुनः सञ्चालनमा लाइएको छ । नयाँ ट्रान्सफर्मर सो स्थानसम्म पुर्याउन स्थानीयवासी र नेपाल विद्युत् प्राधिकरणका कर्मचारीले झोलुङ्गे पुलको सहारा लिनुपरेको छ । नेपाल विद्युत् प्राधिकरण भरतपुर वितरण केन्द्रका अनुसार केही दिन अगाडि ट्रान्सफर्मर जलेपछि विद्युत् आपूर्ति प्रभावित भएको थियो ।

पुरानो ट्रान्सफर्मर हटाएर नयाँ ट्रान्सफर्मर जडान गरिएपछि अहिले विद्युत् सेवा नियमित भएको छ । भरतपुर वितरण केन्द्रका सूचना अधिकारी विनोद ढकालका अनुसार नयाँ ट्रान्सफर्मर प्यूघर पुर्याउन स्थानीयवासीले त्रिशूली नदीमाथि रहेको झोलुङ्गे पुलबाट बोकेर तार्न सहयोग गरेका थिए । पुल तारिसकेपछि ट्रान्सफर्मरलाई गाडीमार्फत सम्बन्धित स्थानसम्म पुर्याएर जडान गरिएको ढकालले बताउनुभयो । ट्रान्सफर्मर परिवर्तन भएपछि प्यूघरका ६२ घरपरिवारमा विद्युत् सेवा पुनः सञ्चालन भएको छ । विद्युत् सेवा अवरुद्ध भएपछि प्रभावित स्थानीयवासीलाई नयाँ ट्रान्सफर्मर जडानसँगै राहत मिलेको छ ।

प्यूघरमा ट्रान्सफर्मर लैजाँदा त्यहाँको पूर्वाधारको समस्या पुनः सतहमा आएको छ । घुमाउनेमा निर्माणाधीन पक्की पुल अलपत्र अवस्थामा रहेकाले सवारीसाधनमार्फत सहज रूपमा विद्युतीय उपकरण तथा अन्य सामग्री ओसारपसार गर्न कठिनाइ हुँदै आएको छ । पक्की पुल निर्माण सम्पन्न भएको भए ठूला तथा अत्यावश्यक सामग्री सवारीसाधनबाटै सम्बन्धित स्थानसम्म पुर्याउन सहज हुने थियो । पुल निर्माण अलपत्र हुँदा स्थानीयवासीले झोलुङ्गे पुलबाट सामग्री बोकेर नदी पार गर्नुपर्ने बाध्यता छ ।

स्थानीयका अनुसार विद्युत् सेवा, खाद्यान्न, निर्माण सामग्रीलगायत दैनिक उपभोग्य वस्तुको ओसारपसारमा सडक तथा पुलले समस्या पार्दै आएको छ । विशेषगरी आपत्कालीन अवस्थामा आवश्यक पर्ने भारी सामग्री लैजान झोलुङ्गे पुलबाट मानिसकै भर पर्नुपर्ने अवस्था छ । घुमाउने पुल निर्माण सङ्घर्ष समितिका संयोजक सिद्धान्त थापामगरले पुल निर्माण नहुँदा यस भेगका हजारौँ जनताले सास्ती खेपिरहेको बताउनुभयो ।

घुमाउनेको ठेक्का तोडियो तनहुँको आँबुखैरेनी गाउँपालिका र चितवनको भरतपुर महानगरपालिका जोड्ने त्रिशूली नदीमाथिको घुमाउनेघाटको पुल १२ वर्षदेखि अलपत्र रहेकामा सडक डिभिजन कार्यालय दमौलीले ठेक्का तोडिसकेको छ । उक्त ठाउँमा नयाँ ठेक्का प्रक्रिया सुरु गरिएको कार्यालयले जनाएको छ । तोकिएको अवधि र थपिएको म्यादमा समेत काम सम्पन्न नगरेको तथा पटकपटक निर्देशन दिएको भए पनि निर्माण व्यवसायीले कुनै प्रयास नगरेपछि ठेक्का तोडिएको सडक डिभिजन कार्यालय दमौलीका प्रमुख राजीव श्रेष्ठले बताउनुभयो ।

मृत सञ्जीवनी निर्माण कम्पनी हेटौँडासँग पहिलोपटक विसं २०७० असारमा पुल निर्माणका लागि सम्झौता भएको थियो । सोही स्थानमा नयाँ पुल निर्माणका लागि अध्ययन सुरु भइसकेको छ । बोलपत्र आह्वान गर्न चालु आर्थिक वर्षमा रु एक करोड ५० लाख बजेट विनियोजन गरिएको छ ।