प्रसारण लाइन निर्माणः स्थानीयद्वारा क्षतिपूर्तिको माग

तनहुँ। दमौली-लेखनाथ प्रसारण लाइनअन्तर्गत टावर निर्माणका लागि तनहुँको व्यास नगरपालिका-५ क्षेत्रमा जग्गा अधिग्रहण प्रक्रिया अगाडि बढिसकेको छ । जग्गा रोक्का भइसकेको विषयमा समयमा जानकारी नपाएको भन्दै प्रभावित स्थानीयले असन्तुष्टि जनाएका छन् । ध्रुवनाथ पण्डित, श्रीभद्र आचार्य, विजय वाग्लेलगायत स्थानीयले आफ्नो मुख्य सम्पत्ति उक्त जग्गा भएको उल्लेख गर्दै न्यायोचित क्षतिपूर्तिको माग गर्नुभएको छ ।

“हाम्रो सम्पत्ति त्यही जग्गा हो, अरु केही छैन । पहिल्यै जग्गा रोक्का भएको रहेछ, पछि मात्रै थाहा पायौँ”, पण्डितले भन्नुभयो । प्रसारण लाइनको तार घरमाथिबाट लैजाँदा जोखिम बढ्ने भएकाले टावरको स्थान अन्यत्र सार्न उहाँले आग्रह गर्नुभयो । स्थानीय वाग्लेले आफूहरूलाई पर्याप्त जानकारी नदिई प्रक्रिया अघि बढाइएकामा गुनासो गर्दै प्रभावित क्षेत्रका बासिन्दासँग समन्वय नगरी काम अगाडि बढाउँदा अन्योल सिर्जना भएको बताउनुभयो । उहाँले पारदर्शी ढङ्गले मूल्याङ्कन गरी उचित क्षतिपूर्ति पाउनुपर्ने माग गर्नुभयो । जिल्ला प्रशासन कार्यालय तनहुँका सहायक प्रमुख जिल्ला अधिकारी दीपक रेग्मीले मुआब्जा निर्धारणको प्रक्रिया बाँकी रहेको जनाउँदै प्रभावित जग्गाको विवरणका आधारमा मुआब्जा निर्धारण गरी वितरण गरिने बताउनुभयो । आयोजना प्रमुख जगदीश पौडेलले आयोजनाको काममा ढिलाइ हुँदा निर्माण व्यवसायीले समेत क्षतिपूर्ति माग गर्न थालेका बताउँदै समयमा काम सम्पन्न गर्न स्थानीयको सहयोग आवश्यक रहेकामा जोड दिनुभयो ।

व्यास नगरपालिका–५ का वडाध्यक्ष विष्णुकुमार श्रेष्ठले स्थानीयबाट गुनासोसहितको निवेदन प्राप्त भएको जानकारी दिँदै माग सम्बोधनका लागि आवश्यक पहल गरिने बताउनुभयो । “स्थानीयको चासो र सुरक्षा हाम्रो पहिलो प्राथमिकता हो, सम्बन्धित निकायसँग समन्वय गरेर समाधान खोज्छौँ”, उहाँले भन्नुभयो । प्रमुख जिल्ला अधिकारी शिवलाल तिवारीका अनुसार आयोजना प्रभावित क्षेत्रबाट गुनासो आएकाले हाल प्रभावितको विवरण सङ्कलन भइरहेको छ । “पहिलो चरणमा टावर निर्माण सुरु गर्ने तयारी भएको छ । मुआब्जा सम्बन्धमा उचित मूल्याङ्कन गरी जानकारी दिनेछौँ”, उहाँले भन्नुभयो ।

जर्मनी सरकारको केएफडब्लु विकास बैङ्कमार्फत सहवित्तपोषित परियोजनाअन्तर्गत करिब ४५ किलोमिटर लामो २२० केभी डबलसर्किट प्रसारण लाइन निर्माण तथा लेखनाथ र दमौलीमा आधुनिक ग्यास इन्सुलेटेड सबस्टेसन स्थापना गरिने जिल्ला प्रशासन कार्यालयले जनाएको छ । करिब एक हजार मेगावाट प्रसारण क्षमता भएको यस परियोजनाले क्षेत्रीय विद्युत् सञ्जाललाई सुदृढ बनाउने, तनहुँ जलविद्युत् आयोजनालगायत जलविद्युत् परियोजनाबाट उत्पादित विद्युत्को प्रभावकारी प्रसारण सुनिश्चित गर्ने विश्वास सरोकार भएकाहरूले लिएका छन् ।