हरिखेतान कलेजद्वारा बाढी प्रभावित नागरिकलाई पाँच लाख सहयोग

पर्सा। हरिखेतान बहुमुखी कलेजले बाढी तथा पहिरोबाट प्रभावित नागरिकको राहत तथा उद्धारका लागि रु पाँच लाख सहयोग गरेको छ । वीरगञ्जस्थित सामुदायिक शिक्षण संस्था सो कलेजले आज एक कार्यक्रमकाबीच बाढी तथा पहिरोबाट प्रभावित नागरिकको राहत तथा उद्धारका लागि प्रधानमन्त्री दैवी प्रकोप उद्धार कोषमा पाँच लाख रूपैयाँ सहयोग गरेको हो ।

कलेज व्यवस्थापन समितिका सल्लाहकार जयप्रकाश खेतानले कलेजले सामाजिक उत्तरदायित्वअन्तर्गत उक्त रकम प्रधानमन्त्री राहत कोषमा जम्मा गरेको जानकारी दिनुभयो । कलेज प्रमुख किशोरी रायले भन्नुभयो, “विपद्को समयमा शैक्षिक संस्थाहरूले पनि आफ्नो सामाजिक उत्तरदायित्व निर्वाह गर्नुपर्छ, त्यसैले पनि रसुवाको भोटेकोटेमा बाढी तथा पहिरो प्रभावित परिवारको राहत, उद्धार तथा पुनःस्थापनामा पाँच लाख सहयोग गरेका छौँ ।”

कलेजले गरेको आर्थिक सहयोगले विपद्बाट प्रभावित परिवारको राहत तथा पुनःस्थापनामा सहयोग पुग्ने अपेक्षा गरिएको छ । यो कलेज उद्योगी तथा समाजसेवी स्व विहारीलाल खेतानले आफ्ना छोरा स्व हरि खेतानको स्मृतिमा २०३८ सालमा स्थापना गरिएको हो ।