बिक्रम बाबा मन्दिरमा भक्तजनहरुको घुईचो

शंकर सुवेदी
बैशाख ८,२०८१
आज बैशाख ८ गते चैत्र शुक्ल द्धादशीका दिन बिक्रम बाबा मन्दिरमा भक्तजनहरुको घुईचो लागेको छ । आज करिब एक लाख जति भक्तजनहरुको उपस्थिति रहेको पुजा व्यवस्थापन समितिले जनाएको छ ।
आज सनिबार पनि भएको र हिजो एकादशी भएका कारण पशु बलि दिनेहरु भक्तजनहरु पनि आज अन्य दिन भन्दा उल्लेख्य रुपमा धेरै भएको समितिले जनाएको छ ।

हरेक वर्ष चैत औँसिदेखि पूर्णिमासम्म बिक्रम बाबा मन्दिरमा पुजा हुने गरेको छ । मेलामा चितवनसहित छिमेकी जिल्लाहरु तथा छिमेकी राष्ट्र भारतबाट पनि दर्शनार्थी तथा भक्तजनहरु आउने गर्छन् । विक्रम बाबाको पूजा परापूर्वकालदेखि थारु जातीले गर्ने भए पनि पछिल्लो समय अन्य जातजातीको पनि यसमा आस्था बढेको देखिन्छ ।
किवंदन्तीअनुसार वनाम गरेको आदीबासीको ‘गुरौ’ बाघको आक्रमणबाट ज्यान गएको ठाउँमा पूजा गरे भाकल पूरा हुने, परिवारमा शान्ति, सन्तान प्राप्ति, मनोकामना पूरा हुने विश्वास छ । चितवन राष्ट्रिय निकुञ्ज क्षेत्रमा चैत २६ गतेदेखि विक्रम बाबा पुजा सुरु भएको हो । पुजा गर्न आउने भक्तजनको सुरक्षाका लागि निकुञ्ज सुरक्षार्थ खटिएको खड्ग दल गणले विशेष सुरक्षा व्यवस्था लागू गरेको छ।