‘माध्यमिकी परिक्रमाले दुई देशबीच धार्मिक, सांस्कृतिक सहिष्णुता बढाउँछ’

धनुषा । मधेस प्रदेशका प्रमुख सुमित्रा सुवेदी भण्डारीले मिथिला माध्यमिकी परिक्रमा धार्मिक यात्राका साथै नेपाल र भारतबीच धार्मिक, सांस्कृतिक सहिष्णुता बढाउने माध्यम रहेको बताउनुभएको छ । आज धनुषाको मिथिला बिहारी नगरपालिका–८ बाट मिथिला बिहारीको डोला शुभारम्भ कार्यक्रमलाई सम्बोधन गर्दै उहाँले माध्यमिकी परिक्रमाले नेपाल र भारतबीचमा धार्मिक, सांस्कृतिक र कुटनीतिक सम्बन्धलाई बलियो बनाउने अवसर प्रदान गर्ने धारणा राख्नुभयो । मिथिला बिहारी नगरपालिकालाई धार्मिकस्थानका रूपमा पहिचान दिने उद्देश्यले नामाकरण गरिएको भन्दै यसले यहाँको धार्मिक महत्वलाई अझ प्रगाढ बनाएको प्रदेश प्रमुख भण्डारीले उल्लेख गर्नुभयो । उहाँले भन्नुभयो, “मिथिला बिहारी क्षेत्रको नामाकरण धार्मिक आस्थाको प्रतीक हो । यस क्षेत्रले धार्मिक र सांस्कृतिक धरोहरलाई प्रगति र समृद्धिको पथमा अघि बढाएको छ ।” मिथिला बिहारी भगवान्को डोला निकालेर परिक्रमा गराउने परम्परा नेपाल र भारतका विभिन्न स्थानमा पुग्ने गर्दछ । सांस्कृतिक र धार्मिक मान्यताका आधारमा सुरु भएको यो परम्परा १५ दिनसम्म रहन्छ । “यस परिक्रमा यात्राले केवल धार्मिक आस्था बलियो बनाउने मात्र नभई यसले विभिन्न संस्कृतिको सङ्गमका रूपमा पनि समाजलाई एकजुट राख्छ”, प्रमुख भण्डारीले भन्नुभयो । यस परिक्रमा यात्रामा नेपाल र भारतका विभिन्न क्षेत्रबाट लाखौँ श्रद्धालु भक्तजन, साधुसन्त र महन्थको सहभागिता रहने जनाइएको छ । प्रदेश प्रमुख भण्डारीले यसको धार्मिक र सांस्कृतिक महत्वलाई सबैले संरक्षण र प्रवर्द्धन गर्दै जानुपर्नेमा जोड दिनुभयो । उहाँले भन्नुभयो, “यो धार्मिक यात्रा दुई देशका नागरिकबीचमा सद्भाव, आत्मीयता र सहयोगको सन्देश प्रवाह गर्ने अवसर हो । यसले नेपाल र भारतबीचको कुटनीतिक, धार्मिक र पारस्परिक सम्बन्धलाई अझ मजबुत बनाउन मद्दत गर्दछ ।” भगवान् रामकी धर्मपत्नी सीता माताको अर्को नाम मिथिला रहेको उल्लेख गर्दै उहाँले मिथिलाञ्चल क्षेत्र पवित्र स्थलका रूपमा चिनिन्छ र यसको ऐतिहासिक, धार्मिक तथा सांस्कृतिक महत्व स्वदेश तथा विदेशमा पनि रहेको बताउनुभयो । मिथिला माध्यमिकी परिक्रमा नेपाल र भारतका धार्मिकस्थलमा विश्राम गर्दै १५ दिनसम्म जारी रहन्छ । प्रदेश प्रमुख भण्डारीले यात्रा अवधिभर सहभागी हुने साधुसन्त, सन्यासी, नागा तथा अन्य श्रद्धालुको स्वागत र सम्मान गर्न स्थानीय बासिन्दा एकजुट भएर काम गर्नुपर्नेमा जोड दिनुभयो । उहाँले यात्राका सबै सहभागीलाई शुभकामना समेत दिनुभयो । यात्राका क्रममा नेपाल र भारतका विभिन्न धार्मिकस्थलमा विश्राम गरेर भक्तजन भगवान् मिथिला बिहारी, किशोरीजी र अन्य प्रमुख धार्मिकस्थलको दर्शन गर्न अघि बढ्नेछन् । यात्राको समापन जनकपुरधाममा पञ्चकोशी परिक्रमा र जानकी मन्दिरको दर्शन गरेसँगै हुनेछ । नेपालकको महाकुम्भ मानिने १५ दिने मिथिला माध्यमिकी परिक्रमा शुभारम्भको अवसरमा मधेस प्रदेशका प्रदेशका प्रमुख भण्डारीले यस क्षेत्रको धार्मिक र सांस्कृतिक महत्वलाई जोड दिँदै परिक्रमा यात्रा सफलतापूर्वक सम्पन्न हुने विश्वास व्यक्त गर्नुभयो ।