राम मन्दिर दान चोरी प्रकरणः बाथरुममा लुकाइन्थ्यो नगद

अयोध्या । अयोध्यास्थित राम मन्दिरको दान रकम चोरी प्रकरणमा प्रहरीले गरेको अनुसन्धानका क्रममा नयाँ–नयाँ तथ्य बाहिर आएका छन्।

पक्राउ परेका ८ जना आरोपितसँग अदालतको अनुमति लिएर गरिएको सोधपुछमा उनीहरूले दान रकम हिनामिना गर्ने तरिका, सीसीटीभीको अवस्थाबारे जानकारी, सुरक्षा व्यवस्थाको कमजोरी तथा नगद बाहिर लैजाने योजनाबारे विस्तृत खुलासा गरेको प्रहरीले जनाएको छ।

प्रहरीका अनुसार आरोपितहरू गणना कक्षमा जडान गरिएका सीसीटीभी क्यामेराको अवस्थाबारे पूर्ण रूपमा जानकार थिए। उनीहरूलाई क्यामेराले कुन दिशामा दृश्य कैद गर्छ भन्ने जानकारी भएकाले रकम निकाल्ने क्रममा एक जनाले नगद लुकाउँदा अन्य कर्मचारीले वरिपरि घेरा बनाएर क्यामेराको दृश्य अवरुद्ध गर्ने गरेको दाबी गरिएको छ।

अनुसन्धानका क्रममा सबैभन्दा चासोको विषय बनेको तथ्य भनेको गणना कक्षबाट निकालिएको नगद तत्काल बाहिर नलगी मन्दिर परिसरको बाथरुममा अस्थायी रूपमा लुकाइने गरिएको दाबी हो। प्रहरी स्रोतका अनुसार वातावरण सामान्य भएपछि र निगरानी कम भएको समयमा उक्त रकम बाहिर निकालिने गरेको बयान आरोपितहरूले दिएका छन्।

प्रहरीले यस दाबीको पुष्टि गर्न घटनास्थल, सीसीटीभी फुटेज र अन्य प्रमाणको विश्लेषण गरिरहेको जनाएको छ।

अनुसन्धानमा संलग्न स्रोतका अनुसार गणना कक्षको एउटा चाबी टिन्नु यादवसँग रहने गरेको र अर्को चाबी बैंकका कर्मचारीसँग हुने गरेको खुलेको छ। यही व्यवस्थाको दुरुपयोग गरेर दान रकममा हेरफेर भएको हो वा होइन भन्ने विषयमा प्रहरीले थप अनुसन्धान गरिरहेको छ।

बैंकका अभिलेख, कर्मचारीको भूमिका तथा सम्पूर्ण दान व्यवस्थापन प्रणालीको समेत विस्तृत अध्ययन भइरहेको जनाइएको छ।

मुख्य आरोपितमध्येका अविनाश शुक्ल पक्राउ परेपछि अनुसन्धानको दायरा एक योग केन्द्रसम्म पुगेको छ। प्रहरीका अनुसार अविनाश आफ्ना भाइ अभिषेकसँग कौशलपुरीस्थित एक प्रतिष्ठित योग केन्द्रमा बस्दै आएका थिए।

प्रहरीले उक्त केन्द्रमा छापा मार्दा त्यहाँबाट केही नगद बरामद भएको स्थानीयको दाबी छ। योग केन्द्रमा ‘राम राज्य कोष’ लेखिएको दानपेटी र डिजिटल भुक्तानीका लागि क्यूआर कोडसमेत भेटिएको बताइएको छ। त्यसको प्रयोग कुन उद्देश्यका लागि गरिएको थियो भन्ने विषय पनि अनुसन्धानको दायरामा परेको छ।

योग केन्द्रकी सञ्चालिका सीमा तिवारीले अभिषेक लामो समयदेखि त्यहाँ शिक्षकका रूपमा कार्यरत रहेको र पछि उनले आफ्ना भाइ अविनाशलाई पनि त्यहीँ ल्याएको बताएकी छन्। घटना सार्वजनिक भएपछि सबै जना स्तब्ध भएको र आरोप पुष्टि भए दोषीलाई कडा कारबाही हुनुपर्ने उनको भनाइ छ।

अनुसन्धान अब पक्राउ परेका व्यक्तिमै सीमित नरही गणना कक्षसँग सम्बन्धित सबै कर्मचारीसम्म विस्तार गरिएको छ। प्रहरी स्रोतका अनुसार अनुसन्धान अधिकृतले कर्मचारीसँग आय–व्यय, बैंक खाता, सम्पत्ति, लगानी तथा आर्थिक कारोबारको विवरण मागेका छन्।

पछिल्ला केही वर्षमा कस–कसको आर्थिक अवस्था अस्वाभाविक रूपमा परिवर्तन भयो भन्ने विषयमा समेत अनुसन्धान भइरहेको छ। दान रकम गणना गरेर बैंकसम्म पुर्‍याउने प्रक्रियामा ४४ जना कर्मचारी विभिन्न जिम्मेवारीमा संलग्न रहेको जनाइएको छ।

विशेष अनुसन्धान टोली (एसआईटी) ले गणना कक्षदेखि बैंकसम्म नगद पुर्‍याउने सम्पूर्ण प्रक्रियाको छानबिन आवश्यक रहेको निष्कर्ष निकालेको छ। यस क्रममा निजी सुरक्षा गार्ड, बैंक कर्मचारी, ढुवानी व्यवस्थापन तथा सम्बन्धित सबै पक्षको भूमिकाको अध्ययन भइरहेको प्रहरीले जनाएको छ।

घटनापछि श्रीराम जन्मभूमि परिसरमा चढावा गणनाको सम्पूर्ण प्रणालीमा परिवर्तन गरिएको छ। अहिले गणना कक्ष पूर्ण रूपमा सीसीटीभी निगरानीमा सञ्चालन भइरहेको छ भने क्यामेराको निगरानीका लागि अतिरिक्त कर्मचारी खटाइएको छ।

कक्षमा प्रवेश गर्ने र बाहिरिने प्रत्येक कर्मचारीको बहुस्तरीय जाँच गरिनुका साथै ड्रेस कोडसमेत लागू गरिएको छ।

प्रहरीले हालसम्म यस प्रकरणमा २६ जनाको बयान लिइसकेको छ। साथै अन्य कर्मचारी र सुरक्षा निकायका सदस्यसँग पनि लामो सोधपुछ गरिएको छ। अनुसन्धान निकायले प्राविधिक प्रतिवेदन र वित्तीय कागजातको विश्लेषण अझै बाँकी रहेकाले अनुसन्धानको दायरा थप विस्तार हुन सक्ने भारतीय मिडियाहरुले जनाएको छ।