‘वैकल्पिक विकास वित्त परिचालन विधेयक’ दफावार छलफलका लागि समितिमा पठाइयो

काठमाडौँ। प्रतिनिधिसभाले ‘वैकल्पिक विकास वित्त परिचालन विधेयक–२०८१’ लाई दफावार छलफलका लागि समितिमा पठाएको छ । सभाको आजको बैठकले उपप्रधानमन्त्री तथा अर्थमन्त्री विष्णुप्रसाद पौडेलले राख्नुभएको सो विधेयकलाई दफावार छलफलका लागि सम्बन्धित समितिमा पठाइयोस् भन्ने प्रस्ताव सर्वसम्मतिले स्वीकृत गरेको हो । बैठकमा कृषि तथा पशुपन्छी विकासमन्त्री रामनाथ अधिकारीले नेपाल पशु चिकित्सा परिषद् (पहिलो संशोधन) विधेयक प्रस्तुत गर्नुभएको थियो । त्यसअघि बैठकमा सभामुख देवराज घिमिरेले सभाअन्तर्गतका विभिन्न विषयगत समितिमा सदस्यको नाम हेरफेरसम्बन्धी प्रस्ताव प्रस्तुत गर्नुभयो । सो प्रस्तावलाई सभाले सहमति जनाएको थियो । बैठकले नेपाल कम्युनिष्ट पार्टी (एमाले) का तर्फबाट २०४८ सालमा प्रतिनिधिसभामा निर्वाचित सांसद खगराज शर्माको यही साउन ५ गते निधन भएकामा उहाँप्रति श्रद्धाञ्जलि व्यक्त गर्दै शोक प्रस्ताव पारित गरेको छ । प्रतिनिधिसभाको अर्को वैठक यही साउन २१ गते १ः०० बजे बस्नेछ ।