सर्पले टोकेको बालकलाई अस्पतालकाे सट्टा झाँक्रीमा लैजाँदा मृत्यु

रौतहट । रौतहटको गुजरा नगरपालिका–७ मा विषालु सर्पले टोकेका सात वर्षीय बालकको समयमै उपचार नपाउँदा मृत्यु भएको छ।

सर्पदंशपछि अस्पताल लैजानुको सट्टा झारफुक गराउन लगिएका बालकको अवस्था बिग्रिए पछि मात्रै अस्पताल पुर्‍याउँदा उनको मृत्यु भएको हो ।

स्थानीय लालबाबु रामका छोरा छोटेलाल रामलाई शुक्रबार बिहान करिब ३ः०० बजे विषालु सर्पले टोकेको थियो। सर्पले टोकेको थाहा पाएपछि परिवारले तत्काल स्वास्थ्य संस्थामा लैजानुको सट्टा गाउँकै झाँक्रीकहाँ पुर्‍याएर झारफुक गराएका थिए।

झारफुककै क्रममा बालकको अवस्था थप गम्भीर बने पछि परिवारले उनलाई चन्द्रपुरस्थित सरकारी अस्पताल पुर्‍याएको थियो। तर, अस्पताल पुग्दा चिकित्सकले बालकलाई मृत घोषणा गरेका थिए।

यो घटना सर्पदंशको उपचारमा अझै पनि ग्रामीण क्षेत्रमा विद्यमान अन्धविश्वास र स्वास्थ्य सेवाप्रतिको पहुँच तथा चेतनाको समस्यालाई उजागर गर्ने अर्को उदाहरण बनेको छ। सर्पदंशमा विषको प्रकार र मात्रा अनुसार अवस्था छिट्टै गम्भीर बन्न सक्ने भएकाले उपचारमा भएको केही घण्टाको ढिलाइसमेत ज्यानका लागि घातक हुन सक्छ।

झारफुकले विषको असर रोक्ने वैज्ञानिक प्रमाण नभए पनि सर्पदंशपछि त्यसैलाई उपचारको विकल्प मान्ने प्रवृत्तिका कारण कतिपय बिरामी अस्पताल पुग्न ढिलो हुने गरेका छन्। यस्तो अवस्थामा स्थानीय स्वास्थ्य संस्था, जनप्रतिनिधि र समुदायस्तरका अगुवाले सर्पदंशसम्बन्धी गलत धारणा हटाउन प्रभावकारी जनचेतना फैलाउनु पर्ने देखिन्छ।

विशेषगरी वर्षायाममा सर्पदंशको जोखिम बढ्ने भएकाले विषालु सर्पले टोकेको शंका लाग्नेबित्तिकै बिरामीलाई अनावश्यक हिँडडुल नगराई सकेसम्म छिटो उपचार हुने स्वास्थ्य संस्थामा पुर्‍याउनु नै सबैभन्दा महत्वपूर्ण हुन्छ। गुजरा नगरपालिका–७ को यो घटनाले समयमै सही उपचार नपाउँदा एउटा बालकको ज्यान गएको गम्भीर सन्देश दिएको छ।