सुगर रोगीले पनि गर्न सक्छन् रक्तदान: डा. भोजराज अधिकारी

चितवन । मधुमेह (सुगर) रोग लागेका व्यक्तिले पनि रक्तदान गर्न सक्ने कुरा एक चिकित्सकीय परीक्षणबाट पुष्टि भएको छ ।
पुष्पाञ्जली अस्पतालका वरिष्ठ फिजिसियन डा. भोजराज अधिकारीका अनुसार इन्सुलिन प्रयोग नगर्ने सुगर रोगीले अन्य सामान्य व्यक्तिहरु जस्तै रक्तदान गर्न सक्ने बताउनु भएको छ ।

डा. अधिकारीले अनुसार “यदि विरामीले इन्सुलिन लिइरहेका छैनन् भने उनीहरुको रक्तदानले कुनै समस्या गर्दैन । यस्तो रक्त अरु व्यक्तिहरुलाई दिन सकिन्छ ।”

यही सन्देश फैलाउन आज आक्रमण न्यूज डटकमका प्रधान सम्पादक टिकादत्त तिमिल्सिनाले स्वयं २२ वर्षपछि रक्तदान गर्नुभएको छ । उहाँलाई लामो समयदेखि मधुमेह थियो । रक्तदानपछिको अनुभव साझा गर्दै तिमिल्सिनाले भन्नुभयो, “ब्लड दिएपछि पुरानो रगत निस्केर नयाँ उत्पादन हुने हुँदा ब्लडमा सुगरको मात्रा पनि सन्तुलित हुन सक्छ भन्ने डाक्टरको सल्लाह पाएपछि रक्तदान गरेको हुँ । अबका दिनमा अन्य सुगर बिरामीलाई पनि रक्तदान गर्न प्रेरणा दिन चाहन्छु ।”

चितवनमा पछिल्ला दिनमा रगत अभाव देखिएको बेला यो रक्तदानले महत्त्वपूर्ण सन्देश दिएको छ । ब्लड डोनर्स सोसाइटी नेपालमा केन्द्रिय वरिष्ठ उपाध्यक्ष हरिप्रसाद न्यौपानेका अनुसार “चितवनमा रगतको अभाव भइरहेको बेला यस्तो सचेतना र प्रेरणा दिने रक्तदान महत्वपूर्ण छ । सुगरका बिरामीले पनि रक्तदान गर्न मिल्छ भन्ने प्रमाणसँगै अब रक्तदाता वृत्त बढ्ने अपेक्षा गर्न सकिन्छ ।”