तीन दशकको खेल समर्पणको सम्मान : चितवनका खेलकर्मी रामजी ढकाल नगदसहित सम्मानित

चितवन । खेलकुद केवल प्रतिस्पर्धा र पदकको विषय मात्र होइन, यसलाई जीवनभरको समर्पण, संघर्ष र सेवाको माध्यम बनाउने व्यक्तित्वहरू पनि उत्तिकै सम्मानका हकदार हुन्छन्। यस्तै एक समर्पित खेलकर्मी रामजी ढकाललाई बिहीबार विशेष सम्मान प्रदान गरिएको छ।

चितवन जिल्ला खेलकुद विकास समितिका कार्यालय प्रमुख रामजी ढकाललाई नेपाल तेक्वान्दो संघ चितवन शाखाले नगदसहित सम्मान गरेको हो। सौराहामा आयोजित रेफ्री सेमिनार कार्यक्रममा ढकाललाई चितवनको खेलकुद क्षेत्रमा पुर्‍याएको लामो र उल्लेखनीय योगदानको कदरस्वरूप सम्मान गरिएको संघले जनाएको छ।

सम्मान कार्यक्रममा चितवन जिल्ला खेलकुद विकास समितिका अध्यक्ष राजन कार्की, नेपाल तेक्वान्दो संघ चितवनका अध्यक्ष शैलेश श्रेष्ठलगायतले ढकाललाई सम्मानपत्र तथा नगद प्रदान गरेका थिए। कार्यक्रममा उपस्थित खेलकर्मी, प्रशिक्षक तथा खेलप्रेमीहरूले लामो समयदेखि खेल क्षेत्रको विकासमा ढकालले निर्वाह गरेको भूमिकाको प्रशंसा गरेका थिए।

कार्यक्रमका प्रमुख अतिथि अध्यक्ष राजन कार्कीले चितवनको खेलकुद क्षेत्रलाई संगठित, व्यवस्थित र गतिशील बनाउन ढकालले पुर्‍याएको योगदान अतुलनीय रहेको बताए। उनले खेलाडी, प्रशिक्षक र खेल संस्थाबीच समन्वय कायम गर्दै जिल्लाको खेलकुद विकासमा ढकालले निरन्तर नेतृत्वदायी भूमिका खेलेको उल्लेख गरे।

ढकाल विगत तीन दशकदेखि नेपाली खेलकुद क्षेत्रमा सक्रिय छन्। चितवन जिल्ला खेलकुद विकास समितिमा मात्र उनले २३ वर्षभन्दा बढी समयदेखि निरन्तर सेवा गर्दै आएका छन्। उनको अथक मेहनत, लगनशीलता र खेलप्रतिको समर्पणले चितवनलाई खेलकुद गतिविधिको महत्वपूर्ण केन्द्रका रूपमा स्थापित गर्न सहयोग पुगेको खेलकर्मीहरूको भनाइ छ।

लामो समयको इमानदार सेवा, समर्पण र खेलप्रेमको सम्मानस्वरूप प्राप्त यो सम्मानले ढकालको व्यक्तिगत योगदानलाई मात्र होइन, पर्दा पछाडि बसेर खेलकुदको भविष्य निर्माण गर्ने सम्पूर्ण खेलकर्मीहरूको मूल्यांकन भएको सन्देश समेत दिएको छ। खेलकुदप्रतिको उनको समर्पण भावी पुस्ताका लागि प्रेरणाको स्रोत बनेको छ।