ज्येष्ठ नागरिकका बारेमा जनचेतना जरुरी छ : प्रदेश प्रमुख भट्ट

गण्डकी। गण्डकी प्रदेशका प्रमुख डिल्लीराज भट्टले ज्येष्ठ नागरिकका बारेमा जनचेतना अभिवृद्धि जरुरी रहेको बताउनुभएको छ । जेष्ठ नागरिक सरोकार समाज, कास्कीको आयोजनामा पोखरा ३१ मा सञ्चालित शिव महापुराण धार्मिक समारोहको आज शुभारम्भ गर्दै उहाँले ज्येष्ठ नागरिकहरूलाई सङ्गठित गरी उनीहरूका समस्याको पहिचानको साथै समाधानका उपायको खोजी गर्नुपर्ने बताउनुभयो । प्रदेश प्रमुख भट्टले ज्येष्ठ नागरिकको मानव अधिकारको संरक्षण, स्वस्थ र मर्यादित जीवनशैलीको प्रवर्द्धन गर्दै उहाँहरूमाथि हुने दुव्र्यवहार, हिंसा र विभेद्को रोकथाम जरुरी रहेको उल्लेख गर्नुभयो । ज्येष्ठ नागरिकको सामाजिक सुरक्षाको प्रत्याभूति दिनु राज्यको दायित्व भएको उल्लेख गर्नुहुँदै उहाँले भन्नुभयो, “राज्य सँगसँगै ज्येष्ठ नागरिकका क्षेत्रमा विभिन्न सङ्घसंस्था तथा निजीस्तरले पनि सरोकार राख्नुपर्छ ।” धार्मिक तथा सांस्कृतिक गतिविधिलाई प्रवर्द्धन गर्ने उद्देश्यले समाजले गरेको शिव महापुराण महायज्ञ, ब्राह्मणद्वारा हवन, पूजाअर्चना आदि कार्यक्रमबाट धार्मिक पर्यटन प्रवर्द्धनमासमेत टेवा पुग्ने उहाँले विश्वास व्यक्त गर्नुभयो ।