ललितपुर महानगरपालिकाको काम प्रशंसनीय र उदाहरणीयः गृहमन्त्री गुरुङ

ललितपुर। गृहमन्त्री सुधन गुरुङले नागरिकको सेवामा ललितपुर महानगरपालिकाले गरेको काम प्रशंसनीय र उदाहरणीय रहेको बताउनुभएको छ । ललितपुर महानगरपालिकाले बालकुमारीदेखि बल्खुसम्म जडान गरेको ‘स्मार्ट स्ट्रिट लाइट’को शुभारम्भ कार्यक्रममा उहाँले महानगरपालिकाले कला, संस्कृति र सभ्यताको संरक्षणमा गरेको काम अनुकरणीय रहेको बताउनुभयो ।

गृहमन्त्री गुरुङले ललितपुर र भक्तपुरले नेपालको कला, संस्कृति र परम्पराको संरक्षणमा महत्वपूर्ण योगदान गरेको उल्लेख गर्दै त्यहाँ पुग्दा देशको गौरव महसुस हुने बताउनुभयो । उहाँले ललितपुर महानगरपालिकाले नयाँ सोचका साथ सञ्चालन गरेका कामबाट गृह मन्त्रालयले समेत सिक्न सक्ने बताउँदै यस्ता नवप्रवर्तनलाई निरन्तरता दिनुपर्नेमा जोड दिनुभयो ।

गृहमन्त्री गुरुङले आफूमा शासकीय घमण्ड र सत्ताको लोभ नभएको उल्लेख गर्दै देश र समाजका लागि सकारात्मक काम गर्ने प्रतिबद्धता व्यक्त गर्नुभयो । महानगरपालिकाका प्रमुख चिरीबाबु महर्जनले बालकुमारीदेखि बल्खुसम्मको सात दशमलव नौ किलोमिटर सडकखण्डमा जडान गरिएको स्मार्ट स्ट्रिट लाइटले दुर्घटना न्यूनीकरणमा सहयोग पुग्ने बताउनुभयो । उहाँले स्मार्ट स्ट्रिट लाइटको अवधारणा नेपालमा ललितपुर महानगरपालिकाले सुरु गरेको दाबी गर्नुभयो ।