ओली सरकारका दुइ मन्त्री मुछिएको घुस प्रकरणको नालिवेलि

ओली सरकारका दुई मन्त्री घुस प्रकरणमा मुछिएका छन् । कास्कीको मालपोत कार्यालयको प्रमुख परिवर्तन गर्न र भूमि आयोगको अध्यक्ष नियुक्तिका लागि बिचौलियाले मन्त्रीहरूसँग आधा करोडको घुस डिल गरेको अडियोसहितको उजुरी अख्तियार दुरुपयोग अनुसन्धान आयोगमा पुगेको छ ।

यो प्रकरणले सरकारको सुशासन र पारदर्शितामाथि गम्भीर प्रश्न उठाएको छ । मालपोत कार्यालयको प्रमुख परिवर्तन गर्न र आफू अनुकूलको कर्मचारी नियुक्तिका लागि बिचौलियाले मन्त्रीसँग ५३ लाखदेखि ७८ लाखसम्मको घुस डिल गरेको अडियो अख्तियारमा पुगेको छ । यो प्रकरणमा सङ्घीय मामिला तथा सामान्य प्रशासन मन्त्री राजकुमार गुप्ता र भूमि व्यवस्था मन्त्री बलराम अधिकारीको नाम मुछिएको छ ।

बिचौलियाको भूमिकामा पोखराका सुजन लामा रहेको र उनी भूमि व्यवस्था मन्त्रालयका चर्चित बिचौलिया प्रमोद खड्काका चेलोका रूपमा परिचित छन् । अडियोमा लामाले मन्त्री गुप्तालाई कास्की मालपोतको प्रमुख परिवर्तन गर्न र भूमि आयोग कास्कीको अध्यक्षमा खेमबहादुर पुनलाई नियुक्त गर्न आग्रह गरेको सुनिन्छ ।

उनले मन्त्रीलाई २० लाखदेखि ५३ लाखसम्मको घुसको प्रलोभन देखाएको र मन्त्री गुप्ताले जवाफमा मन्त्री अधिकारीले पहिल्यै घुस लिइसकेको दाबी गरेको अडियोमा उल्लेख छ । मन्त्री गुप्ताले भनेका छन्, ‘बलरामले ऊसँग पैसा खाइसक्या छ, बलरामले गर्दैन ।’ यस्तो संवादले मन्त्रीहरूबीच घुसको खेलमा समेत प्रतिस्पर्धा रहेको देखिन्छ ।

यो प्रकरणको केन्द्रमा कास्कीको बाटुले चौरमा रहेको १३५ रोपनीको लिची बगैँचा छ । भाट, राणा, शाह र थकालीहरूको नाममा रहेको यो जग्गा हत्याउन बिचौलियाले मालपोत कार्यालयको प्रमुख परिवर्तन गर्न खोजेको देखिन्छ । तत्कालीन भूमि व्यवस्था मन्त्री रञ्जिता श्रेष्ठ हुँदा यो समूहले उनलाई प्रयोग गरेर जग्गा हत्याउने प्रयास गरेको थियो ।

तर, रञ्जिता मन्त्रीबाट हटेपछि यो समूहले मन्त्री गुप्ता र अधिकारीमार्फत आफ्नो स्वार्थ पूरा गर्न लागिपरेको छ । रञ्जिताले यो विषयमा मन्त्री गुप्तासँग पाँच पटक भेट गरेको तर काम नबनेपछि बिचौलियाले आधा करोडको घुस डिल गरेको अडियोले देखाउँछ । अडियोमा बिचौलियाले मन्त्री गुप्तालाई लस्सी, माछा र रक्सीको अफर गरेको र जवाफमा लामाले रक्सी नखाने तर काम भएपछि मन्त्रीलाई नै रक्सी खुवाउने बताएको सुनिन्छ । यो संवादले मन्त्री र विचौलियाबीचको निकट सम्बन्ध र घुसको खेललाई प्रष्ट पार्छ ।

कास्की मालपोत कार्यालयका प्रमुख चिरञ्जिवी पौडेललाई हटाएर आफू अनुकूलको कर्मचारी ल्याउन बिचौलियाले यो डिल गरेको हो । पौडेल २०५६ सालका नम्बर १ का अधिकृत हुन् । उनले आफ्नी क्यान्सर रोगी श्रीमतीको उपचार र रेखदेखका लागि घर पायक सरुवा मागेर माघ २०८१ देखि कास्की मालपोतमा हाजिर भएका थिए । १३ वर्ष दमौली, लमजुङ र स्याङ्जा मालपोतमा वेदागी कर्मचारीका रूपमा काम गरेका पौडेललाई पाँच महिना नपुग्दै हटाउन बिचौलियाले मन्त्रीहरूलाई प्रयोग गरिरहेका छन् ।

बिचौलियाको समूहले पौडेलको ठाउँमा रामचन्द्र अधिकारीलाई ल्याउन चाहेको छ । रामचन्द्रलाई गत असोज ६ गते कास्कीबाट लमजुङ सरुवा गरिएको थियो । अवधि नपुगी सरुवा गरिएको भन्दै उनले अदालतमा मुद्दा हालेका थिए, तर अदालतले स्टे अर्डर नदिएपछि पौडेल कास्कीमा हाजिर भएका हुन् । तर, बिचौलियाले आफ्नो स्वार्थअनुसार पौडेललाई हटाएर रामचन्द्रलाई फर्काउन मन्त्रीहरूलाई आधा करोडको प्रलोभन देखाएको छ ।

यो प्रकरणमा भूमि मन्त्रालयका सचिवसमेत जोडिएका छन् । मन्त्रालयका सचिव हुँदा गोकर्णमणि दुवाडी एक दिनमै सरुवामा परेका थिए । पौडेललाई कास्की सरुवा गर्दा दुवाडीको कुर्सी हल्लिएको र उनलाई लमजुङ खटाइएको थियो । यो घटनाले मालपोत कार्यालयको सरुवा प्रकरणमा ठुलो चलखेल हुने गरेको प्रष्ट हुन्छ ।

गत साता अख्तियार दुरुपयोग अनुसन्धान आयोगको टंगाल कार्यालयमा मन्त्री गुप्ताले विचौलियासँग ५३ लाखको घुस डिल गरेका अडियोसहितको उजुरी दर्ता भएको छ । यो अडियोले मन्त्री र विचौलियाबीचको घुसको बार्गेनिङ र उनीहरूको स्वार्थलाई उजागर गरेको छ । कर्मचारी प्रेसले गत फागुनमा यो विषयमा समाचार प्रकाशित गरिसकेको छ, जसले मालपोत कार्यालयमा हुने अनियमितताको गहिरो जरा रहेको सङ्केत गर्छ ।

यो प्रकरणले ओली सरकारको सुशासनको नारामाथि गम्भीर प्रश्न उठाएको छ । मन्त्रीहरूले विचौलियासँग मिलेर घुसको डिल गर्नु र कर्मचारी सरुवामा आर्थिक चलखेल गर्नुले सरकारको विश्वसनीयतामाथि धक्का लागेको छ ।