प्रतिनिधिसभाः रासायनिक मलको सहज व्यवस्था गरियोस्

काठमाडौँ। प्रतिनिधिसभाको आजको बैठकको शून्य समयमा भाग लिने अधिकांश सांसदहरुले धानखेती लगाउने समयमा रासायनिक मल अभावका कारण चिन्तित किसानका समस्या समाधान गर्न सरकारको ध्यानाकर्षण गर्नुभयो । उहाँहरूले यसअघिका वर्षहरूमा जस्तै यस वर्ष पनि मल अभावको समस्याबाट किसान मारमा परेको उल्लेख गर्दै मलको सहज व्यवस्थापन गरियोस् भन्नुभयो । सांसद शम्भुप्रसाद ढकालले फरक प्रसङ्गमा जनताको अपेक्षाअनुसार सरकारी कार्यालयबाट सेवाप्रवाह नहुँदा सर्वसाधारणले दुःख व्यहोर्नुपरेको भनी सरकारको ध्यानाकर्षण गराउनुभयो ।

सांसद ललिता कुमारीले शुद्धशाकाहारी तथा धार्मिक पर्यटकलाई लक्षित गरी खानेबस्ने प्रबन्ध मिलाउन सम्बद्ध पक्षको ध्यानाकर्षण गर्नुभयो । सांसद लालविक्रम थापाले आफ्नो निर्वाचन क्षेत्रमा पर्याप्त बजेट विनियोजन गरेकामा सरकारलाई धन्यवाद दिँदै २५ वर्षदेखि अलपत्र अवस्थामा रहेको इनरुवादेखि कप्तानगन्जसम्मको सडक निर्माणको कामले गति लिएको बताउनुभयो । सांसद लीमा अधिकारीले नेपाली वायुसेवा कम्पनीमाथि लागेको प्रतिबन्ध खुलाउन कूटनीतिक पहल गरियोस् भन्नुभयो ।

सांसद लेखजङ्ग थापाले लुम्बिनी प्रदेशको भीम अस्पतालमा पर्याप्त जनशक्तिसहित आइसियुको अभावमा उपचारबाट सर्वसाधारण वञ्चित हुनुपरेको उल्लेख गर्दै अत्यावश्यक पूर्वाधार र जनशक्तिको व्यवस्था गरी स्वास्थ्य सेवा सुनिश्चित गर्न माग गर्नुभयो । सांसद विक्रम थापाले भारतसँगको समन्वयमा कपिलवस्तुको बाणगङ्गा नदीको तटबन्धको काम अघि बढाउने भनिएकामा अहिलेसम्म केही प्रगति नभएको उल्लेख गर्दै तटबन्धको काम अघि बढाइ बाढीबाट जनतालाई बचाउन अनुरोध गर्नुभयो ।

सांसद विष्णुमाया विकले अस्थायी रुपमा होल्डिङ सेन्टरमा राखिएका सुकुमवासीलाई रु २५ हजार दिएर घर फर्काउन खोज्नु न्यायोचित नभएको बताउनुभयो । सांसद शिवशङ्कर यादवले ‘लोडसेडिङ’को समस्याबाट मधेसका जनता प्रभावित भएको भन्दै सिरहाको २८ ठाउँमा टान्सफर्मर आवश्यक देखिएकाले त्यसको व्यवस्था गरी पीडित जनतालाई राहत दिन अनुरोध गर्नुभयो । सांसद शोभा खनालले कृषिप्रधान देशमा पनि कृषकले खेती गर्ने समयमा रासायनिक मलको अभाव खेप्दै आएको विषयमा ध्यानाकर्षण गराउनुभयो ।

सांसद श्रद्धाकुँवर क्षेत्रीले विद्युत्मा देखिएको समस्याका कारण जनताले सास्ती व्यहोर्नुपरको र महँगीका कारण जनताको जीवनयापनमा समस्या देखिएकोतर्फ सरकारको ध्यानाकर्षण गर्नुभयो । सांसद श्रीधर पोखरेलले बर्दियाका उखु कृषकले लागतअनुसारको मूल्य पाउन नसकेको भनी सरकारको ध्यानाकर्षण गराउनुभयो । सांसद श्रीराम न्यौपानेले जलस्रोत र ऊर्जा क्षेत्रबाट अपेक्षित फाइदा लिननसक्दा देश ‘रेमिटान्स’को भरमा चल्नुपरेको भनी गुनासो गर्नुभयो ।

सांसद सन्तोषराज वंशीले खाद्य सुरक्षासँग प्रत्यक्ष जोडिएको रासायनिक मलको अभाव भएकाले सोको व्यवस्था गर्न सरकारसँग अनुरोध गर्नुभयो । सांसद सन्दीप रानाले पाल्पा जिल्ला अस्पतालसहित देशभर नै ‘एन्टिरेबिज’ खोपको अभाव भएकाले त्यसमा सरकारको ध्यान जाओस् भन्नुभयो ।

सांसद समिना मियाँले मानव र वन्यजन्तुबीचको द्धन्द्ध बढेको अवस्थामा समाधानका लागि आवश्यक समन्वयसहित पहल हुनुपर्ने धारणा व्यक्त गर्नुभयो । सांसद समीक्षा बाँस्कोटाले सबै खालको कानुन तथा नीति निर्देशिका समेटिएको ‘डिजिटल पोर्टल’ सञ्चालन गर्न सरकारको ध्यानाकर्षण गराउनुभयो ।

सांसद सरस्वती लामाले नेपालको बाटो हुँदै कैलाश मानसरोवरको दर्शन गर्न आएका भारतीय पर्यटकले चिनियाँ ‘भिषा’ नपाउँदा नेपालमै अलपत्र पर्ने अवस्था सृजना भएकाले कूटनीतिक पहलमार्फत समस्या समाधान गर्न सरकारको ध्यानाकर्षण गराउनुभयो । सांसद सरिता महतोले बौद्धिक अपाङ्गता भएका बालबालिकाका अभिभावकले सोसम्बन्धी कागजातपत्र पाँच वर्षपछि मात्रै प्राप्त गर्ने विद्यमान प्रावधान सुधार्न गर्न अनुरोध गर्नुभयो ।

सांसद सागर भुसालले पर्वत जिल्लाका दजनौँ सडक वर्षौंदेखि अलपत्र पर्दा वर्षामा हिलाम्मे भई आउजाउको समस्या परेकाले समाधानका लागि सरकारको ध्यानाकर्षण गराउनुभयो । सांसद सजिता खातुन सिद्धिकीले गरिब जनतामाथि हुनेगरेका अन्यय र अत्याचारको अन्त्य गर्न सरकारसँग अनुरोध गर्नुभयो ।

सांसद सीताराम साहले मधेसको सिरहा र सप्तरीका जमिनमा अझै पनि सिँचाइको अभाव रहेको उल्लेख गर्दै समस्या समाधानको लागि सरकारको ध्यानाकर्षण गराउनुभयो । सांसद सिर्जना श्रेष्ठले नेपालका युवाहरु आफ्ना प्रमाणपत्र लिएर विदेश भासिन बाध्य भएकाले सो समस्या रोकथाम र नियन्त्रणको लागि आवश्यक कदम चाल्न सरकारसँग माग गर्नुभयो । शून्य समयमा भाग लिनुहुने सुम्निमा उदास, सुशीलकुमार कानुलगायतका सांसदले रासायनिक मल अभावसहित समसामयिक विषयमा सरकारको ध्यानाकर्षण गराउनुभएको थियो ।