पत्रकार खड्काको जाहेरीपछि कांग्रेस सहमहामन्त्री शिवाकोटीलाई साइबर ब्युरोले बोलायो

शिवाकोटीले बिहीबार बिहान सामाजिक सञ्जालमार्फत प्रहरी लगाएर खोज्नै पर्दैन, काठमाडौं आउँदैछु भनेर सामाजिक सञ्जालमा लेखेपछि प्रहरीले उनलाई खोजिरहेको खुलेको हो ।

फेसबुकमा एक स्टाटस लेख्दै शिवाकोटीले आफूलाई प्रहरी लगाएर खोज्ने काम नगर्न चेतावनी दिएका छन् ।

विचौलिया इनम सापकोटाले कांग्रेसले न्यायाधीशलाई १८ करोड दिएको सुनेको भनेर बयान दिएको अडियो सरकारले नियोजित रुपमा सार्वजनिक गरेको भनेर विरोध गर्दै आएका शिवाकोटीको पछिल्लो टिप्पणी आएको हो ।

उनले लेखेका छन्, ‘सरकार तिम्रो भय र पारेको भ्रमले विचलित हुन्न, प्रहरी लगाएर खोज्नु पर्दैन, काठमाडौं आउँदैछु ।’ शिवाकोटीले स्टाटस लेखेको केही मिनेटभित्रै पत्रकार खड्काले लक्षित गर्दै सामाजिक सञ्जालमा कडा टिप्पणी लेखेका छन् । जसमा अब आफू चुप लागेर नबस्ने भन्दै खड्काले शिवाकोटीमाथि विभिन्न लाञ्छनासमेत लगाएका छन् ।

शिवाकोटीले इनम सापकोटा बिचौलियाको एसेट भएको, कुमार बेनको घरमा दुई दिनसम्म मोबाइल राखेर त्यहीँबाट कांग्रेस सभापति गगन थापालाई जोडेर अडियो बनाइएको आरोप लगाउँदै आएका छन् । त्यसैले अहिले उनी सरकारको निशानामा समेत परेका छन् ।