पत्रकार विनोदबाबु रिजालको ‘नैबेद’ सार्वजनिक, समकालीन समाजको यथार्थ उजागर गर्ने सशक्त कथासङ्ग्रह

भरतपुर । पत्रकार तथा लेखक विनोदबाबु रिजालको दोस्रो कृति ‘नैबेद’ कथासङ्ग्रह एक आत्मीय र सौहार्दपूर्ण समारोहका बीच आइतबार भरतपुरमा सार्वजनिक गरिएको छ। साहित्यप्रेमी, लेखक, पत्रकार तथा शुभेच्छुकहरूको उल्लेखनीय उपस्थितिमा सम्पन्न कार्यक्रममा सिर्जनात्मक साहित्यप्रतिको सम्मान र उत्साह झल्किएको थियो।

अक्षर समूह चितवनको आयोजनामा सम्पन्न कार्यक्रममा लेखक रिजालका बुवाआमा तथा छोराछोरीसँगै कवि भूपिन, एक्सपर्ट चितवनका मेनेजर नरहरि पौडेल ‘किरण’ र अक्षर समूह चितवनका अध्यक्ष लेखराम सापकोटाले संयुक्त रूपमा कृतिको विमोचन गरेका थिए। पारिवारिक आत्मीयता र साहित्यिक गरिमाले भरिएको उक्त क्षणले कार्यक्रममा विशेष भावनात्मक वातावरण सिर्जना गरेको थियो।

कृतिमाथि समीक्षात्मक टिप्पणी गर्दै कवि भूपिनले ‘नैबेद’ समकालीन नेपाली समाजका विविध यथार्थ, चुनौती र मानवीय संवेदनालाई गहिरो रूपमा उजागर गर्ने सशक्त कथासङ्ग्रह भएको बताए। उनका अनुसार पुस्तकका कथाहरूले पाठकलाई मनोरञ्जन मात्र नभई समाज, जीवन र मानवीय अस्तित्वबारे गम्भीर रूपमा सोच्न प्रेरित गर्छन्।

उनले विज्ञान, शिक्षा, अन्धविश्वास, वैदेशिक रोजगारी, प्रेम, राजनीति, अपराध, महामारी तथा मनोविज्ञानजस्ता विविध विषयलाई कथामार्फत प्रभावशाली ढंगले प्रस्तुत गरिएको उल्लेख गर्दै लेखकले समकालीन नेपाली समाजको मानसिक, सामाजिक र सांस्कृतिक संक्रमणलाई कलात्मक भाषामा अभिव्यक्त गर्न सफल भएको धारणा व्यक्त गरे।

कार्यक्रममा लेखक विनोदबाबु रिजालसँग अक्षर समूह चितवनका अध्यक्ष लेखराम सापकोटाले विशेष संवाद गरेका थिए। संवादका क्रममा लेखकले ‘नैबेद’को लेखन प्रक्रिया, कथाहरूको विषयवस्तु, सिर्जनाको प्रेरणा तथा आफ्ना साहित्यिक यात्राका विविध अनुभवहरू साझा गरेका थिए।

अक्षर समूहका पूर्वअध्यक्ष रमेश प्रभातले कार्यक्रमको स्वागत तथा सहजीकरण गरेका थिए। कार्यक्रममा उपस्थित साहित्यकार, पत्रकार तथा पाठकहरूले नयाँ कृतिका लागि लेखकलाई शुभकामना व्यक्त गर्दै नेपाली साहित्यमा यसले महत्वपूर्ण योगदान पुर्‍याउने विश्वास व्यक्त गरेका थिए।

यसअघि लकडाउनकालीन अनुभूतिमा आधारित ‘एकान्तबास’ प्रकाशित गरिसकेका लेखक रिजालको यो दोस्रो कृति शिखा बुक्सबाट प्रकाशित भएको हो। १४ वटा कथा समेटिएको **‘नैबेद’**को मूल्य रु. ५९५ निर्धारण गरिएको छ।